23 fevral 2023-cü il tarixində İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti ümummilli lider Heydər Əliyevin anadan olmasının 100 illiyinə həsr olunmuş “Heydər Əliyevin rəqabətədavamlı iqtisadiyyatın formalaşdırılmasında rolu” mövzusunda elmi konfrans keçirib.
Tədbirdə İqtisadiyyat Nazirliyi və Nazirlik yanında Antiinhisar və İstehlak Bazarına Nəzarət Dövlət Xidmətinin və digər dövlət qurumlarının nümayəndələri, millət vəkilləri, ali təhsil müəssisələrinin, biznes assosiasiyalarının rəhbərləri iştirak ediblər. Tədbirdə İqtisadi Elmi Tədqiqat İnstitutunu (ESRI) İdarə Heyəti sədrinin birinci müavini, iqtisad elmləri doktoru Arzu Hüseynova, Elm və tədris şöbəsinin elmi işçisi Elsevər Lətifli, Yerli və beynəlxalq əməkdaşlıq şöbəsinin elmi işçisi Şükür Quliyev və həmin şöbənin kiçik elmi işçisi Samirə Mirzəliyeva təmsil ediblər.
Açılış nitqi ilə çıxış etmiş dövlət xidmətinin rəisi Məmməd Abbasbəyli ümummilli lider Heydər Əliyevin azad rəqabət mühitinin formalaşması ilə nəticələnmiş iqtisadi strategiyasının əhəmiyyətini vurğulayıb.
Qeyd edilib ki, ulu öndərin müəyyən etdiyi strateji inkişaf konsepsiyasının həyata keçirilməsi Azərbaycanda azad bazar münasibətlərinə əsaslanan milli iqtisadiyyatın formalaşmasına, yeni dövrün tələblərinə uyğun iqtisadi sisteminin yaradılmasına və inkişafın təmin olunmasına mühüm əsaslar yaradıb.
Rəqabətin iqtisadiyyatda önəminə diqqət çəkmiş xidmət rəisi vurğulayıb ki, məhz 90-cı illərin ikinci yarısından etibarən “Haqsız rəqabət haqqında” və “Təbii inhisarlar haqqında” Azərbaycan Respublikasının Qanunlarının qəbul edilməsi ilə antiinhisar qanunvericiliyinin formalaşması təmin olunub. Əsası ulu öndər tərəfindən qoyulmuş müasir Azərbaycanın iqtisadi inkişaf strategiyası dövlət başçısı cənab İlham Əliyev tərəfindən uğurla davam etdirilir. Vurğulanıb ki, ölkə rəhbərliyi tərəfindən milli iqtisadiyyatın davamlı inkişafı məqsədilə “Azərbaycan 2030: sosial-iqtisadi inkişafa dair Milli Prioritetlər” təsdiq olunub. Bu sənəddə öz əksini tapmış 5 prioritetdən biri də məhz dayanıqlı, artan rəqabətqabiliyyətli iqtisadiyyatın formalaşdırılmasıdır ki, onun reallaşdırılması üçün sistemli fəaliyyət həyata keçirilir. Bildirilib ki, qəbul edilməsi gözlənilən yeni Rəqabət Məcəlləsi rəqabəti və azad sahibkarlığı təşviq etməklə iqtisadiyyatın inkişafını, istehlakçıların rifahını, məhsul və xidmətlərin keyfiyyətinin artırılmasını təmin edəcəkdir.
İqtisadiyyat nazirinin müavini Sahib Ələkbərov çıxışında qeyd edib ki, məhz ulu öndər Heydər Əliyevin müdrik siyasəti əsasında həyata keçirilmiş tədbirlərin nəticəsi olaraq ölkəmizdə siyasi və makroiqtisadi stabillik əldə edilib və bu da iqtisadi islahatların reallaşdırılmasına möhkəm zəmin yaradıb. Azad bazar iqtisadiyyatının təşəkkül tapması ilə iqtisadiyyatın diversifikasiyası, qeyri-neft sektorunun və regionların inkişafı sürətlənmiş, özəl sektora dövlət dəstəyi gücləndirilib, ölkədə sahibkarlığın, xüsusilə də kiçik və orta sahibkarlığın inkişafı, azad rəqabət mühiti təmin edilib, əhalinin sosial rifahı daha da yaxşılaşıb.
Tədbirdə həmçinin İqtisadiyyat Nazirliyi yanında İctimai Şuranın sədri, Azərbaycan Dövlət İqtisad Universitetinin rektoru Ədalət Muradov, Milli Məclisinin deputatı Ziyad Səmədzadə, Kiçik və Orta Biznesin İnkişafı Agentliyinin İdarə Heyətinin sədri Orxan Məmmədov, Əqli Mülkiyyət Agentliyinin İdarə Heyəti sədrinin müavini Sənan Tapdıqov da çıxış edərək ümummilli lider Heydər Əliyevin iqtisadiyyatın inkişafında misilsiz xidmətlərindən danışıblar.
Daha sonra elmi konfrans “Yeni Azərbaycan iqtisadiyyatında rəqabətlilik” mövzusunda panel sessiyası ilə davam edib. Antiinhisar siyasətinin hüquqi, praktiki və dünya təcrübəsinə əsaslanan cəhətləri panel iştirakçıları tərəfindən ələ alınıb.
